In `t jaor 1996 woort op `n spontaan meneer `n nuij vastelaovends- vereiniging opgeriech. Dit kaom in stand umtot dao e paar vrun oonderein mèt unne gekke sjlaag bedachte vaan: "Zòwwe veer un vasteloavends vereiniging opriechte"? Want veer höbbe heij wel `n kinder vastelaovends-vereiniging de Nazarethsjes, mèr veur de groete waor heij nog niks.

Al waore dao wel de Braniemeekers oet Lummel en Nazareth. En mèt die höbbe veer altied `n gooij en gezònde relasie gehad en dat wèlle veer ouch zier zeker zoe hàwwe. Uzze ierste straotprins woort oetgerope in de Kestiel Cortenbachlaon. Heer woort gebrach op unne pliesie- motor en woort oonder `t màske oetgehaold op unne vrachwage. D`n tap stoont veur de deur. Heer sjreef zich Jack d`n 1ste. Beter bekind es Sjaak Verhaegen.

Mèr `t jaor dao nao woorte veer miejer verpliech um de mèt door te goon. De luij höbbe `t zoe prachtig gevoonde tot veer neet aanders kòste daan heij mèt weijer te goon. En dat höbbe veer daan ouch gedoon.

Zoe heet in de loup d`r jaore de vereiniging zien plaots zeker verdeend! De oetstraoling vaan us is daan ouch mèt de jaore behuurlik gegreujd en veer probere us ouch eder jaor weer beter te presentere.

D`n ammezuur steit beij us hoeg in ut veendel, neet allein mèt de vastelaovend kòmp geer us tege, mèr ouch door ut jaor zien veer altied present es gèt in Nazareth te doen is! Zoe höbbe veer ouch unne rommelmèrret euver genome en hàwwe veer kienaovende veur joonk en aajd. Ouch beij aander fieste en partije in de buurt zien veer altied present.

Zoe es geer wét streve veer daonao um stumming en plezeer te make. En of geer noe kraank, gezònd, érrem of riek zeet, veer zörrege tot eederein ziech beij us kin ammezere!